中評社香港12月29日電／香港政壇吵鬧嘅2015新年將過去，迎接2016 大家都期望有新氣象，Emily 就問咗一眾高官有咩新年許願，以及過去一年難忘事。剛喺北京述職完嘅特首梁振英（CY），話希望促進社會和諧，繼續推動經濟發展、改善民生，而佢同11月上任嘅創新及科技局長楊偉雄異口同聲，話今年最難忘嘅事係創科局成立；不過CY 補多句，話創科局“被立法會部分議員拉布3 年”，似乎對於議會拉布仍然耿耿於懷。
袁國強盼共同維護法治
高鐵一地兩檢引起唔少爭議，有評論擔心會衝擊香港法治，律政司長袁國強喺新年祝願就話希望“大家共同維護法治”，唔知佢呢句話能唔能夠說服到議員支持高鐵撥款呢？
商經局長蘇錦樑忙於搞《2014年版權（修訂）條例草案》，但因為拉布，要拖到1 月先喺立法會繼續二讀。佢嘅新年願望無特別提及呢條法例，但就話該局會繼續促進創意產業蓬勃發展。
早前喺賽跑活動跌傷嘅食衛局長高永文，就特別祝願明報讀者身體健康。而環境局長黃錦星就一如以往，過時過節都呼籲大家千祈唔好做“大嘥鬼”。
回顧2015年，運房局長張炳良都算多災多難，港珠澳橋、高鐵等項目全部超支又延期，但佢話當局喺各項大型運輸基建項目取得進展，同時努力增加土地同房屋供應，回應長遠住屋需要。
勞福局長張建宗就話今年“非常充實和富挑戰性”，話當局推出咗一連串勞工措施，包括鼓勵就業同青年向上流動，亦加強咗家庭支援。美國啱啱加息，財庫局長陳家強對市場最敏感，佢形容2015年嘅環球經濟環境充滿挑戰，仲提醒大家，預計未來國際金融市場、匯率同資金流會加劇波動。
主要官員新年願望*
特首梁振英——
促進社會和諧，繼續推動經濟發展、改善民生
律政司長袁國強＿
大家共同維護法治、改善民生、振興經濟，市民身體健康、生活愉快
財庫局長陳家強——
祝《明報》讀者事事順遂、身體健康，社會百業昌盛，經濟蓬勃發展
財政司長曾俊華——
市民身體健康，事事順利。面對外圍不明朗因素，相信香港2016 年經濟會繼續面臨唔少挑戰，財政司長主要工作係維持良好營商環境同透明開放嘅制度
食衛局長高永文——
祝《明報》讀者身體健康、平安喜樂、事事順利；喺自願醫保上，希望盡快同保險界達成共識，令自願醫保訂下嘅大部分要求早日落實
教育局長吳克儉——
社會從小悉心栽培年輕一代，同時寄望甚殷，政府將喺學生嘅求學同成長階段，同社會各界共同努力
運房局長張炳良——
希望社會各界支持政府覓地建屋嘅努力，以回應市民最迫切嘅住屋問題
保安局長黎棟國——
希望推行嘅政策同措施得到市民支持同認同，香港治安良好，社會穩定和諧
政制及內地事務局長譚志源——
市民家庭幸福、生活美滿，心裡常懷平安同喜樂
勞福局長張建宗——
社會和衷共濟、理性務實；勞福局將繼續跟進多項重要議題嘅諮詢工作
商經局長蘇錦樑——
將繼續促進創意產業嘅蓬勃發展，並希望香港繼續發揮優勢，百業興旺
環境局長黃錦星——
希望社會轉向低碳生活，惜電節能、惜物減廢、惜食是福，咪做大嘥鬼
創科局長楊偉雄——
令香港經濟持續同多元化發展，青年人有更廣闊嘅就業機會，市民生活更便捷
公務員事務局長張雲正——
市民萬事如意、身體健康；公務員團隊將同市民攜手構建和諧團結社會
民政事務局長劉江華——
2016 年係奧運年，期望奧運嘅和平友愛精神傳遍香港
*政務司長林鄭月娥及發展局長陳茂波在截稿前未回覆
來源：明報 |
