中評社香港6月9日電／香港頭條日報陸羽仁專欄文章說，近排賣地真係好飄忽，早前東涌地、粉嶺地低價成交，發展商對買地好似失去晒興趣，搞到樓市好似世界末日咁，到昨日賣何文田山谷道地皮，市場當然唔敢估得咁好，以為佢80億都唔到，點知最後搶到109億元售出，樓面呎價12539元，成為新地王，成績好到你唔信，搞到地產股臨近收市發力，投得地王的新地(016)亦升2%。
昨日外圍麻麻地，美股上日跌超過100點，但亞洲股市反彈，恒指亦高開81點，不過跟住就急插130點，嚇到散戶魂飛魄散，點知又來一個反彈。收市前最後30 分鐘，恒指在地產股推動下，最高升過130點，收市漲109點，收報19487點。昨日個市其實好靜，高低波幅只有176點，大市全日成交降至437億元，係四個月以來最少，若果成交係咁縮落去，絕對唔係好事。
發展商扭完計再做
今次拍賣的何文田地皮，新地今次以呎價12539元投得地皮，比同區豪宅二手價9000元至11000元還要貴，又係麵粉貴過麵包。我請教地產界高人，佢話新地咁出價有佢的道理，新地賣樓包裝一流，佢在九龍城的單個樓盤“譽‧港灣”都賣到8000元至9000元一呎，?家呢塊地皮所在的何文田山谷道高級好多，如果明天新地到售樓同意書可以賣樓，賣20000元一呎都去到貨喎。
我雖然都同意呢個分析，但如果係咁，早前東涌地、粉嶺地其實“應該”賣得更好，因為不少懂得包裝的發展商投得那兩塊地，一樣可以賣到高價賺到錢，不過早排佢唔投。政府推“九招十二式”，發展商唔太高興，所以就放軟手腳唔去投偏遠地區的土地，向政府施壓，但政府不為所動，照樣執行新政策，發展商見抵制都無效，又見何文田山谷道地皮真係靚地，就再出手投地；亦可預計，下次聶歌信山地皮也會賣到好價。
新地今次夠膽咁出價，而好多個發展商都追價追到100億以上，即係話有三、四個發展商都覺得何文田豪宅可以賣到1萬幾、2萬元一呎，隱含睇好後市的意思。
樓市未死得，發展商扭一輪計後，市道會慢慢回復正常，發展商會投番地，賣番樓，樓市會郁番，成為近排無件好事的股市，帶來唯一的暖風。
傳農行收細規模
農業銀行明天通過上市聆訊，大家都關心，在這樣冷清的市道，農行這樣巨型的IPO，究竟上唔上得成。市場已開始傳聞，農行會將本來2000億的集資規模，降低到1100億左右，假設農行在本次IPO共募集資金1100億元，將使其核心資本充足率提高2.52個百分點；而若按照以前市場預期集資2000億元，更可將核心資本會提高4.6個百分點，農行會成為A股資本最充足的上市銀行。在2009年底，農行資本充足率10.07%，核心資本率為7.74%，預計縮細規模發行將使農行核心資本充足率達到10至11%左右，縮細規模令其核心資本增幅減少，影響其放款能力。
證券界又估計，在正常市道，農行想以2倍市帳率(PB)定價，但以目前市況，要降至以1.6倍PB市場才會接受。正路估計，未來兩周香港和內地若不升溫，農行即使減價，去貨仍有壓力。 |
